AEKk bi urtean behin antolatzen duen Korrikaren 14. edizioa Foru lurraldetik, Orreagatik, abiatuko da martxoaren 10ean eta 10 egunez Euskal Herriko hainbat txoko bisitatu ondoren, Bilbora ailegatuko da martxoaren 20an. Aurten Andolin Eguzkitza euskaltzaina omendu nahi izan duen lasterketak, jende andana biltzea espero du, oztopo guztien gainetik AEKk bere eguneroko lanari eutsi diezaion behar duen diru ekarpena lortzeko. Nafarroako Korrikako koordinatzailea den Joxe Aldasorok azaldu dizkigu Korrikaren inguruko xehetasun guztiak.

Korrikaren edizio berri bat, 14.a abiatuko da martxoaren 10ean Orreagatik. Aurtengo leloa “Ni ere bai” aukeratu duzue. Zer ideia bildu nahi izan duzue esaldi horrekin?
Ni ere bai euskararen aldeko jarrera gisa ulertzen dugu, baina ez jarrera hutsala, baizik eta konpromisoaren ideiari lotuta; ez dakienak ikasteko, dakienak erabiltzeko edo bakoitzak ahal duen moduan euskararen normalizazioan aurrerapausoak emateko. “Ni ere” leloak Euskal Herria euskalduntzen parte hartu nahi dudala edo ni ahalegin horren parte naizela adierazi nahi du. Ahalegin horren alde zerbait egiteko prest nagoela edo orain arte egin dudana baino pixka bat gehiago emateko prest nagoela alegia.

Urtetik urtera lasterketa abiatu aitzin ekitaldiz hornituriko egitaraua prestatzen duzue. Euskal kultura sustatzeaz gain, lasterketari begira giroa berotzea helburu duen Korrika kulturalaren baitan, aurten eginiko ekimenen artean zeintzuk nabarmenduko zenituzke?
Andolin Eguzkitzaren omenez eginiko ekitaldiaz gain, hemen Nafarroan aipatzekoa da iragan otsailean Barañaingo Auditoriuman taularatutako Anders Lipusen antzezlana. Sagarroi musika taldearekin batera eginiko ikuskizuna izan zen, musika eta antzerkia uztartzen dituen muntaia berezia. Sari berezia jaso zuen AEKk ematen dituen beken artean. Horrekin batera, martxoaren 4an AEKko beka irabazi duen “Euskararen zazpi pekatu nagusiak” antzezlana taularatuko da Nafarroako Antzerki Eskolan eta haurrei dagokienez, Takolo, Pirritx eta Porrotx pailazoak izanen ditugu martxoaren 2an Iruñeko Salestarren aretoan. Horretaz gain, eskoletan hainbat ekimen antolatu izan dira eta horiek ere egitarau mamitsua osatu dute. Gure webgunea bisitatu daiteke ekitaldi guztien berri izateko (www.korrika.org).

Aurtengo Korrikarekin hilabete eskas zendutako Andolin Eguzkitza euskaltzaina omendu nahi izan duzue. Zer dela eta? Zertan gauzatu da omenaldi hori?
Euskaldun berria izanik, euskara ikasteko eta erabiltzeko hartu zuen konpromisoa kontuan hartu dugu batik bat eta horrekin batera, euskaltzain izatera ailegatu zela. Bere ibilbidea omentzearekin batera, Korrikak omenaldi xume bat eskaini nahi die euskara ikasi duten guztiei, esfortzu edo konpromiso hori egunero hartzen ari diren lagun orori. Andolin Eguzkitza horien guztien sinbolotzat hartuta omendu nahi izan dugu.
Omenaldia Euskalduna Jauregian prestatutako ekitaldi berezi baten bidez egin zen pasa den urtarrilean. Andolinen gustukoak ziren jazz musika eta olerkia uztartuz eginiko ikuskizuna izan zen.

Berriki jakin izan da Nafarroako Gobernuak dexente murriztuko dituela dirulaguntzak hainbat alorretan, baita helduen euskalduntzean ari zareten euskaltegiei ere bai. Korrikaren edizio hau, neurri batean sikiera, oztopo hori gainditzen joateko baliatuko duzue, ezta?
Korrikak eskaintzen digun aukera aprobetxatu nahi izan dugu, prentsa aldetik izaten duen oihartzuna eta jendearekin zuzenean ditugun hartu emanak, azaltzeko zein egoeratan gelditzen den helduen euskalduntze eta alfabetatzea eta berriro ere azpimarratzeko konpromisoaren ideia. Hau da egoera honen aurrean norbanakoak egin behar duela ahalegina aurrera joateko.

Korrika egiteaz gain, badira lasterketarekin bat egiteko bertze modu batzuk. Zeintzuk dira?
Korrikan parte hartzeko aukera aunitz dago. Korrika laguntzaile izanik, txartel bat eskuratzen da eta txartel horren bidez beherapenak lortzen ahal dira hainbat denda eta establezimendutan. Auzotan osatzen diren Korrika batzordeetan parte hartu daiteke, baita antolatzen diren ekitaldi kulturaletan ere. Korrikako webgunea bisitatzen ahal da (www.korrika.org) eta bertan ageri den Ziber Korrika edo Korrika birtualean parte hartu. Korrikan berean lasterka eginez edota atera dugun materiala erosiz ere laguntzen ahal da. Bestalde, diru ekarpenak ongi etorriak izanen dira. Laguntza eman nahi izanez gero, modu aunitz dago eta gurekin harremanetan jartzeko webguneaz gain, 948 21 12 15 telefono zenbakira hots egin daiteke.

Bi Kongo eta hamaika herri

Ba al zenekiten kongotarrek bi hiriburu dituztela? Kontua da Kongo izeneko bi Estatu daudela Afrikan: Kongoko Errepublika (hiruburua: Brazzaville) eta handiagoa den eta 1997 arte Zaire izenaz ezaguna zen Kongoko Errepublika Demokratikoa (hiriburua: Kinshasa). Elkarren ondoan daude eta bien artean 6 miloi biztanle dituzte. Afrikako toki askotan gertatzen den bezala, hemen ere frantsesa da hizkuntza ofizial bakarra baina mintzatuenak kikongo (bi herrialdeetan), teke (Errepublikan), lingala eta swahili (Errepublika Demokratikoan) dira. Herri asko bizi dira bazter hauetan; “kongotarrak” berez kikongoz hitz egiten dutenak dira eta beren lurraldea Angolaraino heltzen da.

Kongotarrak gurean

Nabarmen jaitsi da Nafarroan bizi diren kongotarren kopurua. 100 inguru izatera iritsi ziren baina gaur egun ez dira 40 baino gehiago. Elkarteko presidente Wilfried Nsanguren arabera, “hemen etxebizitza oso garestia denez Aragoira edo Valentziara joan dira asko, han errazagoa baita dirua aurreztea”. Hala ere, badira zenbait urte Nafarroan “Asamblea del Congo” elkartea sortu zela; kide gehienak Kongoko Errepublikatik datoz eta hasieran Zabaldi-Elkartasunaren Etxean biltzen ziren. Besteak beste hemen dituzten kezkez hitz egiteko parada dute elkartean: pisuak alokatzeko trabak, gidabaimena homologatzeko zailtasunak… Gure arteko kongotar gehienak gizonezkoak dira, egoera legalean daude eta eraikuntzan eta lantegietan ari dira beharrean.