Duela 10 urte Nafarroako hainbat euskara teknikariren ekimenari esker Ze berri aldizkariaren lehenengo alea karrikaratu zen euskaraz eta erdaraz. Berriki 50. alea argitaratu da eta hasieratik kazetari lanetan aritu den Reyes Ilintxetarekin egitasmo honek eginiko ibilbideaz solasean aritu gara.

Noiz sortu zen Ze berri eta zer xederekin?
Orain dela 10 urte sortu zen eta hiru aldi edo garai izan ditu. Lehenengoa esan bezala, duela 10 urte hasi zen, euskara teknikari batzuk euskararen inguruko notiziak plazaratzeko zer edo zer egin behar zela pentsatzen hasi zirenean. Ikusi zuten berri horiek euskal guneetara soilik iristen zirela eta ez zirela hortik pasatzen. Iruditu zitzaien erdal guneetara ere eraman behar zirela eta aldizkari bat egitea pentsatu zuten; hasieran oso sinplea, bi tintatan inprimatuta, lau orrialdetakoa...Oso harrera ona izan zuen eta beste teknikari batzuk egitasmoarekin interesatu ziren. Jendea ere oso pozik agertu zenez, handitzea pentsatu zuten eta lehiaketa egin zuten. Bigarren garai honetan, halere, helburu berdinak mantendu ziren: hau da, euskararen inguruko notiziak ematea, batik bat notizia onak, historiari buruzkoak eta gaur egungo kontuetaz. Kolorea eman zitzaion aldizkariari, publizitatea sartu eta orrialde gehiago gehitu. Aldaketa horiekin batera, euskara zerbitzu gehiagok bat egin zuten proiektuarekin, horien artean Iruñeko Udalak. Gaur egun guztira 30 bat herri daude sartuta eta ateak zabalik daude gurekin bat egin nahi duten udalentzat; batik bat Iruñerrian eta hortik behetik. Horixe baita bere esparru naturala. Hirugarren aldian orain sartzen ari gara Ze berriren edizio digitalarekin eta aurrerantzean eginen ditugun berrikuntzekin.

Bitxia izanen zen batzuentzat euskararen sustapenerako aldizkaria izanik euskaraz eta espainolez agertzea. Zer dela eta erabaki zen bi hizkuntzatan egitea?
Bai, batzuentzat bitxia izan da eta guretako ere zaila da erabakitzea notizia bakoitza zein hizkuntzatan joanen den. Baina gure formula horixe da. Guztiontzako aldizkaria izatea nahi dugu: euskaldunentzat eta euskararekin inongo loturarik ez dutenentzat. Erdaldunei begira eduki konkretu batzuk prestatzen ditugu, hainbat kasutan euskaldunontzat oso ezagunak izaten ahal diren gaiak jorratuz, bertsolaritza esaterako. Beste informazio batzuk, zerbitzu informazio direnak, agenda, haur eta gaztetxoendako kontuak euskaraz ematen ditugu, eta euskaldunei begira oro har interesgarriak eta atseginak diren gaiak eskaintzen saiatzen gara, hainbat kasutan euskararekin lotura zuzena ez duten gaiak.

Berriki 50. alea karrikaratu duzue. Orain arte eginiko bideaz zer balantze egiten duzue?
Oro har oso balantze ona egiten dugu. Denborak aurrera egin ahala herri gehiagok parte hartu du eta ale gehiago banatzen joan gara (gaur egun 70.000 inguru). Gehienak postontzietan banatzen dira, baina harpidedunei etxera bidaltzen zaie doan Iruñean, Nafarroan, Euskal Herrian, estatuan eta estatutik kanpo ere bai (10 herrialde ezberdinetara). Gure pertzepzioa oso ona da, jendeak aldizkaria ezagutzen du, interesatzen zaio eta batzuek, gainera, bilduma egiten dute. Bestalde ere parte hartzen duten erakundeak ere pozik daude, beraz, balantzea, positiboa da.

Foru lurraldeko hedabideen artean zuen tokitxoa lortu duzue. Zer ekarpen egiten du Ze Berrik?
Euskara historian zehar zer izan den eta zer eginkizun jokatu duen berreskuratzen saiatzen gara. Horrekin batera, gaur egun egiten diren eta aurrerantzean ere eginen diren kontuen berri ematen ahalegintzen gara. Hori guztia ahalik eta modu atseginenean eta irekienean. Izan ere, euskaldunez gain, euskararekin batere loturarik ez duten horiengana ere iritsi nahi baitugu. Hemen Nafarroan euskaldunak eta erdaldunak elkarrekin, baina batzuetan elkarri bizkar emanda bizi garela ematen du. Batzuek ez dute euskara eta euskal mundua batere ezagutzen eta gure nahia desinformazio harresi ikusezin hori apurtzea da, beti ere modu atseginean.

Nola ikusten duzu euskal hedabideen egoera Foru lurraldean?
Oso egoera zaila da. Berriarekin, Nabarrarekin, herrietako aldizkari eta irratiekin zer gertatzen ari den ikustea besterik ez dago. Egoera larria da. Berriki jakin dugu, gainera, Nafarroako Gobernuak diru laguntza ukatu diola Euskalerria irratiari eta gainontzeko hedabideei ere gutxiago emanen diela. Egoera oso zaila da, batez ere ekonomikoa. Publikoa badago, txikia baina hor dago, eta horregatik diskriminazio positiboa egin beharko litzateke ekonomia mailan. Hemen, ordea, alderantziz egiten da eta horren ondorioz itotze ekonomikoa dator.

Ze Berriren edizio digitala sortu duzue: www.zeberri.com. Etorkizunari begira, zer asmo?
Urtean 6 zenbaki egiten ditugu egun eta gustatuko litzaiguke ale gehiago atera ahal izatea dagoen informazio mordoa plazaratzeko edota orrialde kopurua gehitzea, baina momentuz horrela jarraituko dugula uste dut. Web gunearekin oso ilusionatuta gaude eta agendari sekulako bultzada eman nahi diogu, berritua egon dadin, osatua, e.a. Aldizkariko beste edukiak ere kontsultatzeko aukera izanen da eta hizkuntza ezberdinetan jartzea ere aztertzen ari gara, baina poliki-poliki. Jendeari eskatu nahiko genioke egiten dituen ekitaldi guztien berri eman diezaguten agenda horretan sartu ahal izateko. Horretarako info@heda.es helbidera mezua bidaltzea besterik ez dute egin behar.