|
Oporrak
iragan eta...
Oporrak iragan eta, Kairrikiritik agur
egin nahi dizuegu, eta uda sasoi honetan zuetaz gogoratu garela esan
ere. Izan ere, Karrikiriko lagunak zuek bezain karrikiritar izan gaitezke,
gure asmo nagusia, hitz laburretan esanda, Iruñeko eta inguruko
euskaldunok gero eta elkartuago izatea besterik ez baita.
Dakizuenez, xede horren erdiesteko hainbat zerbitzu antolatu izan dugu
gure elkartean. Uste dugu hizkuntza komunitatea indartsuago egon dadin
hutsuneak betez laguntzen dutela zerbitzu honek. Eta, Karrikiriren lehenbiziko
urratsak eman eta bost urte pasa direlarik, gure eskasiez jabeturik
eta aitortuz, berriro ere, gogoetari ekiten diogu.
Eta gogoeta horretan, nahitaezko ondorioak dira zerbitzuak hobetuz joan
behar dugula, edota jende gehiago balitz gurekin lanean, askoz ere eraginkorragoa
izanen litzatekeela gure ekimena (Karrika bera hobetu, bulegoko zerbitzuak
gero eta gehiago zaindu, lanak perspektiba luzeagora planteatu...; hain
zuzen, bost urteko epe baterako lanari nola ekin planteatzen ari gara
orain).
Horregatik, gure gogoetan zuek ere bazaudete present, eta gonbitea egin
nahi dizuegu, ikasturte honen atarian, zuek ere une batez gelditu eta
pentsa dezazuen ea ez ote duzuen aukeratxoren bat modu batean zein bestean
zuen alearen ekarpena Karrikirirentzat euskaldunok gara langai eta helburu.
Nahi genuke euskaldunontzat ere Karrikiri horren garrantzitsua izan
dadin.
Laster, Nafarroa Oinez; honekin batera, uda aurretik iragarri genizuen
gazteen arteko ekimena: Toka Noka jardunaldia. Aukerak aunitz dira.
Dudarik gabe, tokia eta modua izanen da guztiontzat.
Aurrera begira, ez ahaztu besteentzat, gazteagoentzat, lan egiten dugula,
haiek beren esku izango baitute hizkuntza komunitatea osatzea. Animatu,
beraz, haiendako bideak irekitzen eta tresnak prestatzen laguntzera.
Gu jadanik hasi gara, bost, hamar urte barru euskal komunitatea fresko
eta bizkorragoa izan dadin. Ongi etorri eta laster arte.
|
