|
Bisitari,
bidaiari, turista… ongi etorri euskararen herrira
Euskal Herrian sartzen denak, are Nafarroan
sartzen denak ere, nahasmen handia izan dezake, bide bazterretan ageri
diren letreroak irakurrita. Alde batetik etorriz gero, pentsa lezake
gurean gauza guztiak bi hizkuntzetan prestaturik daudela; beste aldetik
sartuta, ordea, hemen hizkuntza bakarra erabiltzen dugula denok. Iruñera
iritsi eta, aldez aurretik zamaturik dakartzan topiko guztiak sinisturik,
ez luke atzerritarrak euskaldunok gure herrian bagaren ere antzemango.
Zenbait tokitan, horretaz konturaturik, “Ongi etorri. Hemen Euskaraz
bizi gara” gisako agur batez salutatzen dute etorkia. Eta hark
herrialdearen irudi zuzena har dezan turismo sistema egokitua daukate;
honek garrantzia handia dakar diru aldetik: batetik lanpostuak sortzen
direlako, garapen ekonomikoan onura ekarriz, eta bestetik kultur aitzinamendua
ahalbidetzen delako. Kanpotarrari eskaintzen zaiona geure nortasunaren
erakustaldia baita, hizkuntza barne, jakina, eta nortasun horren indartzea
ekar dezake berekin, zorionez. Honetan sakondurik aurkituko dugu “turismo
ekolinguistikoa” deitu ohi dena.
Kontrako adibidetzat, gogora dezakegu hemen nola alemanek edo ingelesek,
beren kulturaren presioaz eta bakarrik turismoan oinarriturik, beste
lurraldetan bertako hizkuntza eta ohiturak aldaraztea lortzen duten,
jatorrizko nortasuna atzerrikoaren aurrean makurraraziz. Kontu handiz
ibili behar dugu guk ere, Maroko aldean edo Cuban, esate baterako zer
gertatzen den ere.
Beste norabidean aipagarri da berriki frantsesez kaleratu den Euskal
Herriari buruzko turismo-gidaliburua. Izugarri saldu den gida, “Le
Guide du Rourtard” bidaiariei Euskal Herria bere osotasunean erakusteko
saioa da, aspektu guztiak –politika, historia, kultura…-
bere orrialdeetan biltzen dituela.
Sanferminetan bisitari asko izaten dugu gure karriketan barrena ibilki;
hartuko ahal dute horiek ere gure herriaren lekukotasun fidela…
guk ere zerbait egin genezake, again, horrela gerta dadin, nahiago baitugu
Nafarroako hiriburutik sevillana panpina edo zezen apaingarria baino
zerbait bertakoagoa eraman dezaten. Hala zuek ere, ezta?
|
