|
Gazteok,
protagonista
Proposamen baten berri dakarkizuegu; urriaren
7an, Nafarroa Oinez baino bi aste lehenago, elkartu eta solasaldi batzuk
izatea gure artean. Larunbat horretan bildu eta gauza garrantzitsu askori
buruz elkarrekin mintzatzea. Horretarako prestaketa bilerak egiten hasiak
gara. Jardunaldia egin eta gero, eztabaiden ondorioak ikasle, irakasle
eta gurasoei emanen dizkiegu. Izan ere, urrian izanen dugu berriro ere
Nafarroa Oinez Iruñean bigarren aldiz segidan; eta pentsatu genuen
aukera polita zela ospakizunaz gain beste zerbait ere egiteko.
Euskaltegi, euskara elkarte eta gazte taldeetan gabiltzan hainbat lagun
bildu eta ditugun kezka eta asmoetatik sortu gonbite hau. Izan ere,
gure inguruan gorabehera asko izaten dugu gure hizkuntza dela eta: etxean,
lagunartean, kalean... faktore asko dago euskaraz egin dezagun ala ez.
Ez gara eroso sentitzen, edo nahiko ahaztua daukagu klasean ikasi genuena,
edo guk bai baina gure lagunek ez dute horrelako gogorik, edo falta
zaigu gauzak esaleko kapazitatea; gero, Unibertsitatean arazoak daude
euskaraz segitzeko, edo irakasleek gehiegi presionatzen digute... Tira.
euskaldunak gara, baina kosta egiten du, gurasoak euskaldunak ez direnean,
edo anai-arrebekin dugun ohiturarengatik; batzuek euskaraz eskolatu
eta gero euskaltegira jo dute hobetzeko asmoz: elebidunak gara, bi hizkuntzak
dakizkigu, baina juxtu aprobatzeko, eta gero ez dugu euskararekin deus
jakin? Ala guretzat pozgarria eta abantaila zaigu telebista, irrati
eta egunkaria euskaraz irakurri ahal izatea eta euskaraz egiten diren
gauza ederrak gozatu ahal izatea!
Ziur aski denok ditugu gure inguruan horrelako urratsetan ibilitakoak.
Batzuk bazterrean geratuko dira, baina asko gara eskolatik euskaldun
atera garenok, eta asko seme-alabak euskaldun izan behar dituztenak
ere. Bestalde, jende gaztea da etorkizunari begira gizartean pisu handiena
izanen duena. Horregatik pentsatu dugu une egokia dela Nafarroa Oinez
gauza horiek planteatzeko.
Lehenengo bilerak maiatzean egin dira, baina aukera izanen duzue parte
hartzeko, ekainean edo gero irailean. Ez da lan asko egin behar. Elkartu
eta iritziak edo ideiak bildu. Animatzen bazarete, Karrikirin informazio
gehiago eta zehatzagoa emanen dizuegu. Gazteok dugu denbora gure aurrean,
behar dugun guztia egiteko, eta protagonista izanen gara pelikula horretan.
|
