Datorren ostegunean, hilak 10, Karrikiri elkartea bere bazkideekin bilduko da urtero legez, elkarteak azken urtean eginiko ibilbideari buruz solasteko. Bertaratuko diren lagunek elkarteak azken hilabeotan bizi izan dituen aldaketak bertatik bertara ezagutzeko parada izanen dute.

Heldu den igandean, hilak 6, Iruñerrian Mintzakide egitasmoaren baitan aritu diren euskaldunak Euskal Herriko beste herri eta hiri batzuetan mintzapraktika ekimenetan parte hartutako taldeekin batera elkartuko dira Arrasaten jai giroan Mintza eguna ospatzeko.

Sortzen Ikasbatuaz elkarteak urtero antolatzen duen Euskal eskola publikoaren aldeko festak bere XV. edizioa beteko du aurten eta heldu den maiatzaren 23an ospatuko da, baina eskenatoki berri batean: Trinitarios eremuan. Izan ere, orain arte Takonera parkean egiten baitzen, baina Iruñeko Udalak obra batzuk eginen zirelaren aitxakian, Trinitarios eremura joateko agindu zien antolatzaileei. 

Zaldiko Maldiko Iruñeko elkarteak jakitera eman duenez, Nafarroa osoan euskaraz aritzen diren komunikabideek, eta horiek artean Karrikiri elkartearen Karrika aldizkariak, jasoko dute aurten Lamien Urrezko Orrazia saria eta Asto Masto saria, aldiz, Javier Azanza, Euskarabideko arduradunari egokituko zaio.

Urtero legez, Zaldiko Maldiko elkarteko kideek hartu dute erabakia eta Nafarroako euskarazko hedabideak saritzerakoan “urte sail luzean egindako lana eta une honetan, diru-laguntza ofizialik gabe, aurrera ateratzeko egiten ari diren ahalegina” kontuan hartu dutela aipatu dute. Saritutako hedabideak hauexek dira, bestek beste: Guaixe, Belaixe, Ttipi Ttapa, Xorroxin irratia, Xaloa, Karrika, Xuka, Zorrokaria, Pulunpe, Esan- erran, Mailope, Euskalerria Irratia, Aralar Irratia, Irati Irratia, Karrape Irratia, Nabarra…